లక్షల ఉద్యోగాలకు ఎసరు పెట్టిన కరోనా

 లక్షల ఉద్యోగాలకు ఎసరు పెట్టిన కరోనా

వేతనాలలోనూ గణనీయమైన కోతలు

భూమిపుత్ర,బ్యూరో:

కరోనా మహమ్మారి దెబ్బకు గతేడాదే కాదు ఈ ఏడాది కూడా చాలామంది ఉద్యోగాలు కోల్పోయారు.కరోనా కారణంగా ఎంతో మంది ఉద్యోగాలు పోగా,మరికొంతమందికి వేతనాల్లో కోత పడింది.ఆ తర్వాత ఏదొక విధంగా కోలుకుంటున్నదనుకున్న సమయంలో సెకండ్ వేవ్ మరింతగా దెబ్బతీసింది.దీంతో మే నెలలో నిరుద్యోగిత రేటు డబుల్ డిజిట్ కు చేరుకుంది.కరోనా లాక్ డౌన్,కఠిన నిబంధనల వల్ల దాదాపు 10 మిలియన్ల ఉద్యోగాలు పోయాయి.ఏప్రిల్ నెలతో పోలిస్తే ఇది అత్యధికం.దేశంలో నిరుద్యోగిత రేటు క్రమంగా డబుల్ డిజిట్స్ దిశగా పరుగు తీస్తోంది.అంతకుముందు సుదీర్ఘ లాక్ డౌన్ విధించినప్పుడు కూడా డబుల్ డిజిట్ నిరుద్యోగిత రేటు నమోదయింది.ఈ నెల 23 వ తేదీతో ముగిసిన వారానికి నిరుద్యోగిత 14.7 శాతానికి చేరుతుందని సెంటర్ ఫర్ మానిటరింగ్ ఇండియన్ ఎకానమీ ( సీఎంఈఐ ) వెల్లడించింది.

గత ఏడాది మాదిరిగా పూర్తిస్థాయిలో ఆంక్షలతో కూడిన లాక్ డౌన్ అమలు కాకున్నా రవాణాపై ఆంక్షలు విధించడం ప్రతికూల ఫలితాలకు దారి తీస్తున్నదని పేర్కొన్నది.ఈ నెల తొమ్మిదో తేదీతో ముగిసిన వారానికి నిరుద్యోగిత రేటు8.7శాతానికి,16 వ తేదీతో ముగిసిన వారానికి 14.3 శాతానికి పెరిగింది.కానీ,గత నెలలో అది 7.97 శాతంగా ఉంది.గ్రామీణ,పట్టణ ప్రాంతాల్లో కూడా నిరుద్యోగిత రేటు పెరిగిందని సీఎంఈఐ తెలిపింది.అయితే గ్రామాలతో పోలిస్తే పట్టణ ప్రాంతాల్లో నిరుద్యోగిత రేటు ఎక్కువగా పెరుగుతున్నది.మే 6 వ తేదీ నాటికి సగటున నిరుద్యోగిత రేటు 10.2 శాతానికి చేరుకుంది.ఇది నికరంగా పెరుగుతూ వచ్చింది.మే 20 వ తేదీ నాటికి 12 శాతం,23 నాటికి 12.7 శాతంగా నమోదైందని సీఎంఈఐ తెలిపింది.అధిక సంఖ్యలో కార్మికులు ఉద్యోగాలు కోల్పోవడం వల్ల నిరుద్యోగిత పెరుగుతున్నట్లు పేర్కొన్నది.దేశంలో నిరుద్యోగం మళ్లీ అసాధారణంగా పెరిగిపోయిందని భారతీయ ఆర్ధిక గమన పర్యవేక్షక కేంద్రం సెంటర్ ఫర్ మానిటరింగ్ ఇండియన్ ఎకానమీ ( సిఎంఐ ) తెలియజేసింది.

సీఎంబీ కార్యాలయం,ముంబై

పట్టణ ప్రాంత నిరుద్యోగం గత నెల ( ఏప్రిల్ ) 25 తో ముగిసిన వారంలో 9.55 శాతంగా ఉండగా,ఈ నెల 9 వ తేదీతో పూర్తయిన చారంలో 11.72 శాతానికి పెరిగిపోయిందని వివరించింది.నగరాల్లో లాక్డౌన్ ను ఇదే మాదిరిగా కొనసాగిస్తూ పోతే వాణిజ్య పారిశ్రామిక కార్యకలాపాలు పూర్తిగా స్తంభించిపోయి నిరుద్యోగం మరింత పేట్రేగిపోతుందని ఈ సంస్థ హెచ్చరించింది.గత ఏడాదితో పోలిస్తే ప్రస్తుత పట్టణ నిరుద్యోగం పెరుగుదల రేటు తక్కువే అయినప్పటికీ అప్పుడు నెలల తరబడి దేశమంతటా కఠోర లాక్ డౌన్ విధించిన నేపథ్యంలో పట్టణ నిరుద్యోగం 27.83 శాతానికి ఎక్కి కూర్చుందని,ఇప్పుడు జాతీయ లాక్ డౌన్ లేని సమయంలో 12 శాతం రేటు కూడా ఆందోళనకరమైనదేనని ఆర్ధిక నిపుణులు భావిస్తున్నారు.ఇందుకు పలు నగరాల్లోని లాక్ డౌన్లు కొంత వరకే కారణమని మొత్తం మీద ఆర్థిక వ్యవస్థను ఇంతకు ముందు నుంచి పీడిస్తున్న బలహీనతలు సైతం ఇందుకు హేతువులని భావిస్తున్నారు.

గ్రామీణ ఆర్థిక రంగమైతే ఉపాధులు,ఉద్యోగాలకు బొత్తిగా అవకాశం లేని స్థాయిలో కుంగిపోయి మంచం పట్టిపోయిందని అభిప్రాయపడుతున్నారు.గ్రామీణ ప్రాంతాల్లో ఈసరికే బాగా వేళ్లూనుకొని ఉండవలసిన వ్యవసాయాధార పారిశ్రామిక రంగం ఆశించినంతగా పుంజుకోకపోడం ఇందుకు కారణం. కరోనా మొదటి దశలోనే ఘోర పతనాన్ని అనుభవించిన ఆర్థిక రంగం ప్రస్తుత రెండవ కెరటం మూలంగా చావు దెబ్బ తిన్నది.ఇందువల్ల పలు సంస్థలు మూతపడి కోల్పోయిన ఉద్యోగాలు మళ్లీ ఎప్పుడూ అందుబాటులోకి రాని పరిస్థితి తలెత్తి ఆవి శాశ్వత నష్టం లెక్కలోకి జారిపోయే ప్రమాదమున్నదని సిఎంఐఐ హెచ్చరించింది.కొన్ని వ్యాపారాలు భవిష్యత్తులో తిరిగి తెరుచుకొని పుంజుకోలేవని స్పష్టం చేసింది.ఇప్పటి దుస్థితికి గత ఏడాదిన్నరగా కొవిడ్ 19 విజృంభణ , పునర్విజృంభణ కొంత కారణం కాగా గతంలో తీసుకున్న తప్పుడు విధాన నిర్ణయాలు , వైఫల్యాల వల్ల ఆర్థిక స్థితి తిరిగి లేవలేని స్థాయికి కుప్పకూలిందని నిపుణులు చెబుతున్న దానిని కాదనలేము.

ఇందుకు 2016 లో తీసుకున్న పెద్ద నోట్ల రద్దు నిర్ణయాన్ని,వస్తు,సేవల పన్నుఅపసవ్య అమలును ఉదహరిస్తున్నారు.పెద్ద నోట్ల రద్దు వల్ల ప్రజల జేబులు ఖాళీ అయిపోయి చిన్న సంస్థలు మూతపడిపోయి సరకులకు,ఉత్పత్తులకు డిమాండ్ దారుణంగా పడిపోయిందని జీఎస్టి అవకతవకల వల్ల 11 కోట్ల మంది వ్యవసాయేతర జనానికి ఉపాధి కల్పించిన చిన్న , మధ్య తరహా వ్యాపారాలు,పరిశ్రమలు దెబ్బ తిన్నాయని సిఎంబి తేల్చి చెప్పింది.ఒకవైపు వ్యాక్సిన్,ఆక్సిజన్,ఆసుపత్రులు,బెడ్లు తగినంతగా సమకూర్చలేకపోడం వల్ల కొవిడ్ మరణాలు విపరీతంగా పెరిగిపోతుంటే మరోవంక ఉద్యోగాలు,ఉపాధులు అంతరించిపోయి రెక్కాడించి డొక్క నింపుకునే దారులూ మూసుకుపోతున్నాయి.ఆకలి చావులు దాపురించే దురవస్థ నెలకొన్నది.ఈ పరిస్థితుల్లో దేశ నాయకత్వం విజ్ఞత ఉపయోగించి అత్యవసర చర్యలు తీసుకోవలసి ఉంది.ఉపాధులు,ఉద్యోగాలు నష్టపోయిన వారికి నేరుగా నగదు సహాయం అందించాలి.ఉద్యోగులను భరించ గలిగేందుకు వీలుగా చిన్న,మధ్య తరహా సంస్థలకు ఆర్థికంగా తోడ్పడాలని నిపుణులు హితవు చెపుతున్నారు.కేంద్ర పాలకులు ఇకనైనా సానుకూల దృక్పథంతో వీటిని ఆలకించాలి. గ్రామీణ ఉపాధి హామీ పథకాన్ని మరింతగా విస్తరింపచేయాలి. పట్టణాలలో కూడా అటువంటిదానిని రూపొందించి చేపట్టాలి. బయటి నుంచి వచ్చే జాతిహితమైన సలహాలను పని కట్టుకుని తోసిపుచ్చడం,వాటిని అమలు చేస్తే తమకు నామోషీ అని భావించడం పాలకుల లక్షణం కాదు.

Related News

Leave a Reply

Your email address will not be published. Required fields are marked *